Dualchainnt Dhiùra ann an 10 Faclan

A’ leantail oirnn le dualchainntean, ’s e an t-ath eilean, Diùra chreagach nam fiadh, a tha fon phrosbaig.

Beanntan Dhiùra; àrainn phobaill
Beanntan Dhiùra

 

1.       Dad mionaid / dad thusa

Fuirich ort / fuirich mionaid.  ‘Dad thusa a-nis gus an cuimhnich mi.’

 

2.       Crìon

Beag. Patach crìon – Pàiste beag

 

3.       Dìreag

‘Ornament’, ‘knick-knack’ cosail ri rudeigin a ghleidheadh duine air a’ bhreis os cionn a’ ghealbhain (teine).  Is e ‘d’ cosail ri ‘d’ na Beurla a tha an seo is chan e am fuaim a gheibhear ann an ‘dìreach’.

 

4.       Geoicheag

Ainm pàisteanta air muc. ‘Piggy’.

 

5.       Diocan

Ainm pàisteanta air each.  ‘Gee-gee’.

 

6.       Patach

Pàiste

 

7.       Breicmheas

Bracaist.  Tràth-bidhe sa mhadainn.  Bidh feadhainn ag ràdh an ‘mh’ agus feadhainn eile ga fhàgail às.

 

8.       Cha lughaide

Is dòcha, theagamh, faodaidh e bhith.

 

9.       Fìleadh

Sruth adhar fuar a’ tighinn a-staigh tro bheàrn a thaobheigin.  ‘Draught’.

 

10.   Fobharradh

Foghar.  Tha an ‘o’ an seo cosail ris an ‘oi’ ann an ‘goil’, ‘goid’ is a leithid.

 

Na facail a chaidh a thoirt airson Ìle, bha iad air fad ri an cluinntinn ann an Diùra cuideachd, ach dìreach gun e ‘mìr’ a bu mhotha a bhiodh aca ann an Diùra seach ‘stuth’ airson ‘dad/càil/rud sam bith’.

Tha Dàna a’ toirt taing don Oll. Seòras Jones (http://www.gjls.co.uk) airson an liosta seo a chruthachadh. Gur robh math agad!

A bheil dualchainnte sònraichte agad? Am bu mhath leat liosta sgrìobhadh dhuinn? Cuiribh fios thugainn.

Tha an dealbh anns an àrainn phoblach.

Share

Fàg freagairt

Cha dèid an seòladh puist-dhealain agad fhoillseachadh. Tha * ris na raointean a tha riatanach