Bàrdachd | Siridhea |

Dàn ùr le Marcas Mac an Tuairneir.

Damasgas.
دمشق
Homs.
حمص‎
Crìochan na Tuirce.

Seo cogadh cloinne,
Far an glèidh balach
Gunna ri a ghruaidh.
Far an sùilich e
Leans a’ chamara,
Tro shùilean falach donna.

Cuiridh e èideadh an t-saighdeir air;
Atharrais athar.
Achdaichidh cogadh sna sràidean
A bha, aon uair, nan raon-cluiche.

Phàirtich balla;
Pocannan-ghainmhich,
Buidheann a bha roimhe nan càirdean.

Damasgas.
دمشق
Homs.
حمص‎
Crìochan na Tuirce.

Seo cogadh cloinne,
Far an glèidh caileag
A làmhan ri a cluasan.
Mar a rinn i
Le a peathraichean,
Nuair a chaidh am bhodhradh.

Chan eil i ach airson a leasanan a dhèanamh;
An àite sgrìobhaidh is leughaidh,
Is aithne dhi ainmean pheilearan,
Isnichichean, innealan aimhreite.

Diardaoin,
Rinn iad aran san àmhainn,
Is a bràthair beag an uchd a màthar.

Damasgas.
دمشق
Homs.
حمص‎
Crìochan na Tuirce.

Seo cogadh cloinne,
Far an glèidh caileag
Beannag ri a ceann.
Liath-dhearg
Is sradagan oirre,
Rinn i dachaigh ann am batharnach bùtha.

Nì i tomhas air a gheàrr-shuimean;
Dhèanadh i snasachadh,
Nam biodh na goireasan na làmh,
Is ise na bean bheag an taighe.

Na bruadaran,
Chì i cearcall a càirdean,
Taibhseach, ga ghairm dhan dannsa.

Damasgas.
دمشق
Homs.
حمص‎
Crìochan na Tuirce.

Seo cogadh cloinne,
Far an glèidh balach
Gunna ri a ghruaidh.
Far an sùilich e
Leans a’ chamara,
Tro shùilean falach donna.

Tha a beul làn cainnt tìr-ghràidh;
Ach san t-stiùidio-dannsa,
Ionnsaichidh e dòigh cèill eile.
Iomlaid èalachais air ainneart.

Sgal gàire
Is fada air falbh,
Bràighlich bioranachd bragadaiche.

Damasgas.
دمشق
Homs.
حمص‎
Crìochan na Tuirce.

– Marcas Mac an Tuairneir